Poème par Eustorg De Beaulieu Période : 16e siècle
La personne a grand arrogance,
Ou est de sotise pourveue,
Qui ne donne à qui la salue
Ung seul Dieu gard en recompense.
De luy faire la reverence
Luy semble qu’est par trop tenue
La personne.
D’aultres (sans nulle cognoissance)
Ont la bouche si fort cousue
Qu’ung grand mercys n’en prend yssue,
Pour rien qu’ayt faict à leur plaisance
La personne.
Eustorg de Beaulieu
